Hvernig á að breyta sér í ÚLF
Nýlega kom út ævisaga Antons Szandors LaVey, höfuðsmanns "Kirkju Satans" sem ég minntist á í síðasta pistli. Heitir bókin "The Secret Life of a Satanist", og er eftir konu að nafni Blance Barton. LaVey er líka höfundur nokkurra kafla sjálfur, og fjallar einn þeirra um hvernig má gerast varúlfur.
Varúlfur er sá eða sú sem hefur breyst í úlf. LaVey segir að auðvitað sé það ekki hægt í eiginlegri merkingu, heldur sé það sálin sem umbreytist. Hann vill þó meina að umbreytingin geti haft ótrúlega sterk áhrif á líkamann. Fólkið í söfnuði hans sem upplifi þetta ástand finnist að það hafi klær, vígtennur, trýni, o.s.frv. Engin hætta sé samt á að neinn "festist" sem varúlfur, til þess sé mannseðlið allt of sterkt.
Samkvæmt LaVey mun rándýrseðlið vakna í hverjum þeim sem fylgir eftirfarandi leiðbeiningum. Afleiðingarnar verði betra samband við dýrslegu þættina; fólk verði almennt grimmara, og því muni þar með ganga betur í lífsbaráttunni. Í hnotskurn gengur aðferðin út á það að gera sjálfan sig hræddan, en hugsa sér síðan að maður hafi að sama skapi máttinn til að gera aðra hrædda. Best er að útskýra þetta nánar. Nokkrum dögum fyrir fullt tungl skaltu fara á einhvern stað sem vekur hjá þér óhug. Þetta gæti verið eyðibýli að nóttu til, en líka máttu fara eitthvert út í náttúruna langt frá mannabyggð. Þú verður að vera ein(n), og dveldu þarna um stund. Síðan skaltu fara burt, en komdu aftur næstu nótt. Gerðu þetta svo í nokkur skipti, og reyndu að upplifa eins mikinn ótta og þú getur.
Eftir fáeina daga, þegar tunglið er orðið fullt er komið að næsta skrefinu. Það geturðu tekið heima hjá þér. Klæddu þig í svört föt, og ef þú átt gamlan pels, er það ekki verra. Best er að setja upp úlfsgrímu ef hún er fáanleg. Það hljómar auðvitað fáránlega, en þá má benda á að töfralæknar hjá ýmsum "frumstæðum" þjóðum beita keimlíkri aðferð. Þeir klæða sig í dýrsfeld, setja upp viðeigandi grímu, syngja, dansa og berja á trumbu. Þetta virkar sem sjálfsefjun; von bráðar fer þeim að finnast að þeir séu viðkomandi dýr og þá öðlast þeir mátt þess. Það er allavega hugmyndin. Svipað ert þú að fást við, og nú skaltu ímynda þér að þú getir vakið skelfingu hjá öðrum. Láttu sem að þú hafir ummyndast í úlf, og að aðrir óttist þig, alveg eins og þú hefur fundið fyrir ótta undanfarnar nætur. Reyndu að ganga eins langt og þú getur með því að urra, góla, þefa út í loftið, o.s.frv. Skynjaðu grimmd villidýrsins og láttu hana magnast upp í æði. Ef þér tekst þetta muntu finna að ýmsir vöðvar fara að kreppast saman, að því er virðist ósjálfrátt. Þú byrjar að gretta þig; neðri vörin geiflast fram, þú skýtur upp kryppu og hendurnar verða eins og loppur. Þegar þetta skeður ertu orðin(n) að varúlfi! Vertu þannig nokkra stund, en svo skaltu slaka á. Láttu þá ástandið ganga til baka, þar til þér finnst að þú sért orðin(n) að manneskju aftur.
Þetta er galdur sem er stundaður af djöfladýrkendum í "Kirkju Satans", og má hver reyna sem vill. En í sumum galdrareglum, þ.á.m. söfnuði vúdú-biskupsins Micaels Bertiaux, sem ég hef áður minnst á í nokkrum greinum, er gengið enn lengra. Þá fer galdramaðurinn eða konan sálförum í líki úlfs. Fyrst er gerður galdur af svipuðum toga og ég lýsti hér að ofan, og þegar viðkomandi er orðinn að varúlfi fer hann út úr líkamanum (ég mun fljótlega kenna lesendum mínum það). Sem varúlfur er svo ferðast um svörtustu afkima ósýnilega heimsins, en þar eiga að búa allskyns demónar og púkar. Þessar verur myndu ráðast á hvern sem færi um þeirra svæði, en sé maður sjálfur í úlfsmynd verða púkarnir aftur á móti hræddir og flýja burt. Af þessu má sjá að úlfsgaldrar geta verið jákvæðir og notaðir til verndar. Hugmyndin er einfaldlega sú að ef eitthvað skelfilegt ræðst á mann, er best að vera bara fúll á móti.
Galdraseremónía, sem er í svipuðum dúr og er ættuð frá Indlandi, má gera ef manni finnist eitthvað óhreint að handan vera nálægt. Aðferðin er mjög einföld. Sestu á stól og ímyndaðu þér fjóra úlfa í kringum þig, einn í hverri höfuðátt. Þeir horfa allir út frá þér, eru illilegir á svipinn og gæta þín. Sjáðu fyrir þér fjögur hvít bönd sem tengja líkama þinn við úlfana. Hugleiddu þannig nokkra stund, en svo skaltu hugsa þér að úlfarnir leysist upp og verði að ljósboltum. "Sogaðu" síðan boltana inn í þig.
Þetta er aðferð sem hægt er að beita hvenær sem er. Hún dugir ekki aðeins gegn draugum, heldur líka ef einhver er að hugsa illa til manns. Sterkar, fjandsamlegar hugsanir geta nefnilega verið máttugar